ಗೋಡೆಪತ್ರಿಕೆ: ಕಲಿಕೆಗೆ ತರಗತಿಕೋಣೆಯಿಂದ ಹೊರಗಿನ ಅಸಾಧಾರಣ ಕಿಂಡಿ/ಅವಕಾಶ

ಗೋಡೆ ಪತ್ರಿಕೆಯು ಪಠ್ಯಕ್ರಮದಿಂದ ಹೊರಗಿನ ಸಂಗತಿಗಳನ್ನು ಒಳಗೊಳ್ಳುವ ಕಾರಣ, ಸಾಮಾನ್ಯವಾಗಿ ಅದನ್ನು ಪಠ್ಯೇತರ ಚಟುವಟಿಕೆಯಾಗಿಯೇ ಪರಿಗಣಿಸಲಾಗುತ್ತದೆ. ತರಗತಿಕೋಣೆಯಿಂದ ಹೊರಗೆ ನಡೆಯುವ ಚಟುವಟಿಕೆ ಇದು. ಆದರೆ ಗೋಡೆಪತ್ರಿಕೆಯ ತಯಾರಿಯು ಶಿಕ್ಷಕರ ಪ್ರಭಾವ ಮತ್ತು ಹತೋಟಿಯಿಂದ ವಿಮೋಚನೆ ಪಡೆಯುವ ದಾರಿಯನ್ನೂ, ಸ್ವತಂತ್ರವಾಗಿ ಆಲೋಚಿಸುವ ಮತ್ತು ರಚಿಸುವ ದಾರಿಯನ್ನೂ ತೆರೆದುಕೊಡುತ್ತದೆ. ವಿದ್ಯಾರ್ಥಿಗಳ ತಮ್ಮದೇ ಆದ ಹೊಸ ಕಲ್ಪನೆಗಳಿಗೆ ಇಂಬು ಕೊಟ್ಟು, ಆತ್ಮವಿಶ್ವಾಸ ತುಂಬಿ, ಪ್ರಾಯೋಗಿಕವಾಗಿ ಅರ್ಥ ಮಾಡಿಕೊಳ್ಳಲೂ ಅವಕಾಶ ಮಾಡಿಕೊಡುತ್ತದೆ. ಇವೆಲ್ಲವೂ ತರಗತಿಯಲ್ಲಿನ ಏಕಮುಖ ಉಪನ್ಯಾಸ ಅಥವಾ ಪ್ರವಚನಗಳಿಂದ ಸಾಧ್ಯವಾಗುವಂತಹುದಲ್ಲ. ಹೀಗೆ ಸಿದ್ಧಪಡಿಸಲಾದ ಗೋಡೆಪತ್ರಿಕೆಯು ತರಗತಿಕೋಣೆಯಿಂದಾಚೆ ಹೊಸದೊಂದು ಪ್ರಪಂಚವನ್ನೇ ತೆರೆದುಕೊಡುತ್ತದೆ!