ಭಾಷಾ ಬೋಧನೆಯ ಕುರಿತು ಬೋಧಕರು ಹೇಗೆ ಯೋಚಿಸುತ್ತಾರೆ?

ಭಾಷಾ ಕಲಿಕೆ ಮತ್ತು ಭಾಷಾ ಬಳಕೆಯಲ್ಲಿ ಪ್ರಾಥಮಿಕ ಹಂತದ ಬಹುತೇಕ ವಿದ್ಯಾರ್ಥಿಗಳು ವಿಫಲರಾಗಿದ್ದಾರೆ. ಭಾಷೆಯನ್ನು ಕಲಿಸುವ ವಿಷಯದಲ್ಲಿ ಬೋಧಕರು ತಳೆದಿರುವ ಧೋರಣೆ ಈ ವೈಫಲ್ಯಕ್ಕೆ ಕಾರಣವಾಗಿದೆ. ಭಾಷೆ ಒಂದು ಸಂವಹನದ ಸಾಧನ ಎಂದಷ್ಟೇ ಭಾವಿಸುವ ಬೋಧಕರು ಭಾಷೆ ಇಲ್ಲದೆಯೇ ಆಲೋಚಿಸಲು ಸಾಧ್ಯವಿದೆಯೇ ಎಂಬ ತರಹದ ಪ್ರಶ್ನೆಗಳನ್ನು ವಿವೇಚಿಸಲು ಹೋಗುವುದಿಲ್ಲ. ಗದ್ಯ-ಪದ್ಯಗಳನ್ನು ಕಂಠಸ್ಥ ಮಾಡಿಕೊಳ್ಳುವುದು ಭಾಷಾ ಕಲಿಕೆಯ ದೃಷ್ಟಿಯಿಂದ ಅತ್ಯಗತ್ಯ ಎಂಬುದು ಬೋಧಕರ ಮತ್ತೊಂದು ತಪ್ಪು ತಿಳಿವಳಿಕೆಯಾಗಿದೆ. ಬೋಧಕರು ಮಕ್ಕಳ ಕಲಿಯುವ ಸಾಮರ್ಥ್ಯದಲ್ಲಿ ನಂಬಿಕೆ ಇಡಬೇಕಾಗುತ್ತದೆ. ಮಕ್ಕಳು ಸ್ವೋಪಜ್ಞತೆಯಿಂದ, ಪಠ್ಯಪುಸ್ತಕದಿಂದಾಚೆ ಕಲಿಯಬಲ್ಲವು ಎಂಬ ತಿಳಿವಳಿಕೆಯನ್ನು ಬೋಧಕರಾದವರು ಬೆಳೆಸಿಕೊಳ್ಳಬೇಕಾಗುತ್ತದೆ.