ಪರಾಮಾನಸ ಶಾಸ್ತ್ರ

ಪರಾಮಾನಸ ಶಾಸ್ತ್ರವೆಂದರೆ ಬೇರೆಯವರ ಆಲೋಚನೆಗಳನ್ನು/ ಮನಸ್ಸನ್ನು ‘ಓದುವುದು’ ಸತ್ತವರಿಂದ ಸಂದೇಶ ಸ್ವೀಕರಿಸುವುದು ಮುಂತಾದ ವಿಷಯಗಳಿಗೆ ಸಂಬಂಧಿಸಿದ ಅಧ್ಯಯನವಾಗಿದೆ. ಕಣ್ಣು, ಕಿವಿ ಮುಂತಾದ ಇಂದ್ರಿಯಗಳ ನೆರವಿಲ್ಲದೆ ನಡೆಯುವ ಕೆಲವು ಮಾನಸಿಕ ಕ್ರಿಯೆಗಳಿಗೆ ‘ಅತೀಂದ್ರಿಯ ಪ್ರತ್ಯಾಕ್ಷಾನುಭವಗಳು’ (ಇ.ಎಸ್.ಪಿ - ಎಕ್ಸಟ್ರಾ ಸೆನ್ಸರಿ ಪರ್ಸೆಪ್ಶನ್) ಎಂದು ಕರೆಯುತ್ತಾರೆ. ಇಂತಹ ಮನೋವ್ಯಾಪಾರಗಳ ಬಗ್ಗೆ ಧರ್ಮಗ್ರಂಥಗಳು, ತತ್ವಶಾಸ್ತ್ರ ಮುಂತಾದವುಗಳಲ್ಲಿ ಬಹಳ ಉಲ್ಲೇಖ ದೊರೆಯುತ್ತದೆ. ಆದರೆ ವೈಜ್ಞಾನಿಕವಾಗಿ ಇದರ ಅಧ್ಯಯನ ಪ್ರಾರಂಭವಾಗಿದ್ದು 1882 ರಲ್ಲಿ ಲಂಡನ್ ನಗರದಲ್ಲಿ ‘ಭೌತಾತೀತ ವಿಷಯಗಳ ಸಂಶೋಧನಾ ಸಮಾಜದ’ ಸ್ಥಾಪನೆಯಾದಂದಿನಿಂದ. ಆದರೆ ಬಹಳ ಕಠಿಣ ವೈಜ್ಞಾನಿಕ ನಿಯಮಗಳನ್ನು ಅನುಸರಿಸಿ ಪರೀಕ್ಷಿದಾಗ ಪರಾಮಾನಸ ಜ್ಞಾನ ಮತ್ತು ಅನುಭವಗಳಿಗೆ ದೃಢ ಸಾಕ್ಷ್ಯ ಸಿಕ್ಕಿಲ್ಲ. ಏಕೆಂದರೆ ಇದಕ್ಕೆ ಸೂಕ್ತ ಸಿದ್ಧಾಂತದ ತಳಹದಿಯಾಗಲಿ, ವಿಷಯ ಪರಿಶೀಲನೆಗೆ ವಸ್ತುನಿಷ್ಠ ವಿಧಾನÀಗಳಾಗಲಿ ಇಲ್ಲ. ಆದುದರಿಂದ ಇದು ‘ಸ್ಯುಡೋ ಸೈನ್ಸ್- ನಕಲಿ ವಿಜ್ಞಾನ’ ಎನ್ನುವವರೂ ಇದ್ದಾರೆ. ಒಟ್ಟಿನಲ್ಲಿ ಈ ಕ್ಷೇತ್ರದಲ್ಲಿ ಗಟ್ಟಿಯಾದ ಸಾಕ್ಷ್ಯಗಳಿಗಿಂತ ವಿವಾದಗಳೇ ಹೆಚ್ಚಾಗಿವೆ.