ಆರಂಭಿಕ ಭಾಷಾ ತರಗತಿಗಳಲ್ಲಿ ಜಾನಪದ ಅಧ್ಯಯನ ಬಳಸುವುದು

ಈ ಲೇಖನವು ಪ್ರಾಥಮಿಕ ತರಗತಿಗಳಲ್ಲಿ ಸಾಕ್ಷರತೆ ಕಲಿಸಲು ಜಾನಪದವನ್ನು ಬಳಸಬಹುದಾದ ಸಾಧ್ಯತೆಗಳನ್ನು ಕುರಿತದ್ದಾಗಿದೆ. ತರಗತಿಯಲ್ಲಿ ಜಾನಪದವನ್ನು ಬಳಸುವ ಮಹತ್ವವನ್ನು ವಿವರಿಸಿದೆ. ಪ್ರಾರಂಭಿಕ ಕಲಿಕೆಯಲ್ಲಿ ಗ್ರಾಮೀಣ ಪ್ರದೇಶದ ಮಕ್ಕಳ ಹಿನ್ನೆಲೆ, ಮಾತೃಭಾಷೆಗಳನ್ನು ಪರಿಗಣಿಸುವುದು ಬಹಳ ಮುಖ್ಯವೆಂದು ಇದು ಪ್ರತಿಪಾದಿಸುತ್ತದೆ. ನಿರ್ದಿಷ್ಟವಾಗಿ ಇದು ಕರ್ನಾಟಕದ ಯಾದಗಿರಿಯ ಒಂದು ಲಂಬಾಣಿ ತಾಂಡಾದಲ್ಲಿ ನಡೆಸಿದ ಶೈಕ್ಷಣಿಕ ಪ್ರಯೋಗದ ವರದಿಯಾಗಿದೆ. ಮಕ್ಕಳು ತರಗತಿಯಲ್ಲಿ ಕಲಿಯುವ ಸಂದರ್ಭದಲ್ಲಿ ತಮ್ಮ ಮಾತೃಭಾಷೆ ಮತ್ತು ಜಾನಪದ ಹಿನ್ನೆಲೆಯನ್ನು ಬಳಸಲು ಆಸ್ಪದ ನೀಡಬೇಕೆಂದು ಇದು ಸೂಚಿಸುತ್ತದೆ. ಹೀಗೆ ಆಸ್ಪದ ನೀಡಿದಾಗ ಕಲಿಕೆ ಏಕಮುಖಿಯಾಗುವುದಿಲ್ಲ. ಇಂಥದೊಂದು ಕಲಿಕೆಯಲ್ಲಿ ಶಿಕ್ಷಕರ ಪಾತ್ರ ಎಷ್ಟು ಮಹತ್ವದ್ದೆಂದು ಇದು ಸೂಚಿಸುತ್ತದೆ. ಜಾನಪದವು ಮಕ್ಕಳ ಮನೆ ಜಗತ್ತು ಮತ್ತು ಶಾಲಾ ಜಗತ್ತುಗಳ ನಡುವಿನ ಒಂದು ಸೇತುವೆಯಾಗಿದೆ ಎಂಬುದು ಈ ಪ್ರಯೋಗದ ಪ್ರತಿಪಾದನೆಯಾಗಿದೆ. ತರಗತಿಯ ಕಲಿಕೆ ಕೇವಲ ಓದು ಬರಹಕ್ಕೆ ಸೀಮಿತವಾಗದೇ ಮಕ್ಕಳ ಹಾಡು, ನೃತ್ಯ, ನಾಟಕ, ಆಟ ಮುಂತಾದವುಗಳನ್ನೂ ಅಕ್ಷರ ಕಲಿಕೆಗೆ ಹೇಗೆ ಬಳಸಬಹುದು ಎಂಬ ಸಾಧ್ಯತೆಗಳ ಕುರಿತು ಚಿಂತನೆ ನಡೆಸಲಾಗಿದೆ. ಮಕ್ಕಳು ಒಳ್ಳೆಯ ಪಠ್ಯಗಳನ್ನು ಓದಲು ಸಾಕ್ಷರತೆ ಸಾಧಿಸಬೇಕಾದುದು ಮುಖ್ಯವೆಂಬ ಸಾಂಪ್ರದಾಯಿಕ ನಂಬಿಕೆಯನ್ನು ಇದು ನಿರಾಕರಿಸುತ್ತದೆ. ಅಂತಹ ಒಳ್ಳೆಯ ಪಠ್ಯಗಳನ್ನು ಬಳಸಿಕೊಂಡೇ ಅವರನ್ನು ಸಾಕ್ಷರರನ್ನಾಗಿ ಮಾಡಬಹುದು ಎಂಬುದನ್ನು ಇದು ನಾನಾ ಉದಾಹರಣೆಗಳೊಂದಿಗೆ ವಿವರಿಸಿದೆ.