ಕಡಿಮೆ ಬಳಕೆ ಇರುವ ಕಡೆಗಳಲ್ಲಿ ಇಂಗ್ಲಿಷ್ ಭಾಷಾ ಕಲಿಕೆಯನ್ನು ಸುಗಮಗೊಳಿಸಲು ಮಾತೃಭಾಷೆಯನ್ನು ಬಳಸುವುದು

ಈ ಲೇಖನವು ಮಾತೃಭಾಷೆಯ ಮೂಲಕ ಇಂಗ್ಲೀಷ್‌ ಭಾಷೆಯನ್ನು ಕಲಿಸುವ ಸಾಧ್ಯತೆಯನ್ನು ಅನ್ವೇಷಿಸುತ್ತದೆ. ಭಾರತದ ಸಂದರ್ಭದಲ್ಲಿ ಬಹುತೇಕ ಶಿಕ್ಷಕರು ಇಂಗ್ಲೀಷ್‌ ಪಾಠ ಮಾಡಲು ಪ್ರಯಾಸ ಪಡುತ್ತಾರೆ. ತತ್ಪರಿಣಾಮವಾಗಿ ಮಕ್ಕಳೂ ಇಂಗ್ಲೀಷ್‌ನಲ್ಲಿ ಪ್ರಾವೀಣ್ಯ ಗಳಿಸದೇ ಹೋಗುತ್ತಾರೆ. ಭಾರತದ ಬಹುತೇಕ ಮಕ್ಕಳು ಗ್ರಾಮೀಣ ಪ್ರದೇಶದವರಾದ್ದರಿಂದ ಅವರಿಗೆ ಇಂಗ್ಲೀಷ್‌ ಬಳಕೆಯ ವಾತಾವರಣವೇ ಇರುವುದಿಲ್ಲ. ತಮ್ಮ ಮಾತೃಭಾಷೆ ಬಿಟ್ಟು ಅನ್ಯಭಾಷೆ ಅವರಿಗೆ ಗೊತ್ತಿರುವುದಿಲ್ಲ. ಇಂತಹ ಮಕ್ಕಳಿಗೆ ಇಂಗ್ಲೀಷ್‌ ಕಲಿಸುವುದು ಭಾರತೀಯ ಶಿಕ್ಷಕರಿಗಂತೂ ಸವಾಲಿನ ಕೆಲಸವೇ ಆಗಿದೆ. ಪ್ರಸ್ತುತ ಲೇಖನವು ಶಿಕ್ಷಣ ಸಂಶೋಧನೆಯ ಅಭ್ಯಾಸಿಗಳು ಮಹಾರಾಷ್ಟ್ರದ ಒಂದು ಗ್ರಾಮೀಣ ಶಾಲೆಯಲ್ಲಿ ಆರು ದಿನಗಳ ಕಾಲ ನಡೆಸಿದ ಪ್ರಯೋಗದ ನಿರೂಪಣೆಯಾಗಿದೆ. ಆರು ದಿನಗಳಲ್ಲಿ ಮಕ್ಕಳ ಇಂಗ್ಲೀಷ್‌ ಕಲಿಕೆ ಹೇಗೆ ತಕ್ಕ ಮಟ್ಟಿಗೆ ಸುಧಾರಿಸಿತು ಮತ್ತು ಅದಕ್ಕಾಗಿ ತಾವು ಕೈಗೊಂಡ ಪ್ರಯೋಗಗಳ ಸ್ವರೂಪವೇನು ಎಂಬುದನ್ನು ಈ ಲೇಖನ ವಿವರಿಸುತ್ತದೆ. ಇಂಗ್ಲೀಷ್‌ ತರಗತಿಯಲ್ಲಿ ಅನ್ಯಭಾಷೆಯನ್ನು ಬಳಸತಕ್ಕದ್ದಲ್ಲ ಎಂಬುದು ಸಾಮಾನ್ಯ ನಂಬಿಕೆ. ಆದರೆ ಮಾತೃಭಾಷೆಯನ್ನು ಬಳಸುತ್ತಲೇ ಇಂಗ್ಲೀಷನ್ನು ಪರಿಣಾಮಕಾರಿಯಾಗಿ ಹೇಗೆ ಕಲಿಸಬಹುದು ಎಂಬುದನ್ನು ಇದರಲ್ಲಿ ಲೇಖಕರು ಹಂತ ಹಂತವಾಗಿ ವಿವರಿಸಿದ್ದಾರೆ. ಈ ಕಲಿಕೆಯ ಪ್ರಕ್ರಿಯೆಯಲ್ಲಿ ಮಕ್ಕಳ ಇಂಗ್ಲೀಷ್‌ ಜ್ಞಾನವಷ್ಟೇ ಅಲ್ಲ, ಮಾತೃಭಾಷಾ ಜ್ಞಾನವೂ ಸಾಕಷ್ಟು ಸುಧಾರಿಸುತ್ತದೆ.