ಕಥಾವನ – ಒಂದು ವಿಶಿಷ್ಟ ಸಾಹಿತ್ಯೋತ್ಸವ

ಅಜೀಂ ಪ್ರೇಮ್‌ಜಿ ವಿಶ್ವವಿದ್ಯಾಲಯವು ಶಾಲಾ ಮಕ್ಕಳಿಗಾಗಿ ಪ್ರತಿವರ್ಷ ʼಕಥಾವನʼ ಎಂಬ ಕಾರ್ಯಕ್ರಮವನ್ನು ಹಮ್ಮಿಕೊಳ್ಳುತ್ತಿದ್ದು ಸದರಿ ಲೇಖನವು ʼಕಥಾವನʼದ ಐದನೆಯ ಆವೃತ್ತಿಯ ಕುರಿತಾದ ಒಂದು ವರದಿಯಾಗಿದೆ. ಯಾಂತ್ರಿಕ ಬದುಕು, ಜೀವನ ಶೈಲಿಯಲ್ಲಾಗಿರುವ ವ್ಯತ್ಯಾಸಗಳು ಮಕ್ಕಳಲ್ಲಿ ಕಥೆ ಓದುವ ಆಸಕ್ತಿಯನ್ನು ಬತ್ತಿಸುತ್ತಿದೆ. ಇದು ಶಿಕ್ಷಕರ ಬದುಕಿನ ಮೇಲೂ ವಿಷಮ ಪರಿಣಾಮ ಬೀರುತ್ತಿರುವುದು ಆತಂಕದ ವಿಷಯವಾಗಿದೆ. ಪಠ್ಯಪುಸ್ತಕ ಬೇರೆ, ಇತರೆ ಪುಸ್ತಕಗಳು ಬೇರೆ ಎಂಬ ಕೃತಕ ವಿಭಜನೆಯೂ ಸಹ ಮಕ್ಕಳ ಕಲಿಕೆಗೆ ಮಾರಕವಾಗಿದೆ. ಈ ಸಮಸ್ಯೆಯನ್ನು ಎದುರಿಸಿ ನಿವಾರಿಸುವ ನಿಟ್ಟಿನಲ್ಲಿ ʼಕಥಾವನʼ ಒಂದು ಸಣ್ಣ ಪ್ರಯತ್ನವಾಗಿದೆ. ಅತ್ತಿಬೆಲೆ ಮತ್ತು ಸರ್ಜಾಪುರ ಪ್ರದೇಶಗಳ ಸರ್ಕಾರಿ ಶಾಲೆಯ ಮಕ್ಕಳಿಗೆ ಈ ಕಾರ್ಯಕ್ರಮದಲ್ಲಿ ಕಥೆ, ರಂಗಭೂಮಿ, ನಾಟಕ, ಪುಸ್ತಕ ಸಂಗ್ರಹ ಮುಂತಾದವುಗಳ ಬಗ್ಗೆ ವಿಶೇಷ ಮಾಹಿತಿ ಮತ್ತು ತರಬೇತಿಯನ್ನು ನೀಡಲಾಯಿತು. ಸೂತ್ರದ ಬೊಂಬೆ ಬಳಸುವುದು, ಹಾಡು, ಚಿತ್ರಕಥೆಗಳನ್ನು ತರಬೇತಿಯಲ್ಲಿ ಬಳಸಿಕೊಳ್ಳಲಾಯಿತು. ಕಾರ್ಯಕ್ರಮವನ್ನು ಪೂರ್ತಿಯಾಗಿ ಕನ್ನಡದಲ್ಲಿಯೇ ನಡೆಸಲಾಯಿತು. ಕಥಾವನದಲ್ಲಿ ಶಿಕ್ಷಕರಿಗೂ ಸಹ (ಕನ್ನಡ ಮತ್ತು ಇಂಗ್ಲೀಷ್‌ ಎರಡೂ ಭಾಷೆಗಳಲ್ಲಿ) ಕಾರ್ಯಾಗಾರ ನಡೆಸಲಾಯಿತು. ಮುಖ್ಯವಾಗಿ ಗ್ರಂಥಾಲಯಗಳನ್ನು ನಿರ್ವಹಿಸುವ, ಪುಸ್ತಕಗಳನ್ನು ಆಯ್ಕೆ ಮಾಡಿಕೊಳ್ಳುವ ವಿಷಯದಲ್ಲಿ ಅವರನ್ನು ಸಜ್ಜುಗೊಳಿಸಲಾಯಿತು.