ಭಾರತದ ಎರಡು ಶತಮಾನಗಳ ಶೈಕ್ಷಣಿಕ ಚರಿತೆ

ಪ್ರಸ್ತುತ ಲೇಖನದಲ್ಲಿ, ಶಾಲೆಗಳಲ್ಲಿನ ಶಿಕ್ಷಕರ ವಿದ್ಯಾರ್ಹತೆ, ಗುಣ ಲಕ್ಷಣಗಳು, ಮೌಲ್ಯಗಳು ಹಾಗೂ ಶಿಕ್ಷಕ ಶಿಕ್ಷಣ ಸಂಸ್ಥೆಗಳ ಸ್ವರೂಪವನ್ನು ಕುರಿತ ಹಲವಾರು ಅಂಶಗಳನ್ನು ಕುರಿತಂತೆ ಚರ್ಚಿಸಲಾಗಿದ್ದು, ಹತ್ತೊಂಬತ್ತನೇ ಶತಮಾನದ ಪ್ರಾರಂಭದಿಂದ ಇಲ್ಲಿಯವರೆಗೆ ನಮ್ಮ ರಾಷ್ಟ್ರದ ಶಿಕ್ಷಕ ಶಿಕ್ಷಣ ವ್ಯವಸ್ಥೆಯ ಬೆಳವಣಿಗೆಯನ್ನು ಪರಿಚಯಿಸಲಾಗಿದೆ. ಉಪಾಧ್ಯಾಯ ವೃತ್ತಿಯ ಅರ್ಹತೆ, ಶಿಕ್ಷಣದ ಗುರಿ, ಜ್ಞಾನ ವಿಕಸನದ ಹಲವು ಅಂಶಗಳನ್ನು ಲೇಖಕರು ವಿಶ್ಲೇಷಿಸುತ್ತಾರೆ. ಲೇಖನದಲ್ಲಿ, ಭಾರತದ ಸ್ವಾತಂತ್ರ್ಯಪೂರ್ವ ಘಟ್ಟದಲ್ಲಿನ ಬ್ರಿಟಿಷ್‌ ಶಿಕ್ಷಣ ನೀತಿಯ ವಿವರಗಳಿದ್ದು, ವುಡ್‌ ಸಮಿತಿಯ ಶಿಫಾರಸುಗಳನ್ನು ತಿಳಿಸಲಾಗಿದೆ. ಭಾರತದ ಅಂದಿನ ಶೈಕ್ಷಣಿಕ ವ್ಯವಸ್ಥೆಯನ್ನು ಕುರಿತ ಫುಲೆ ಅವರ ಅಭಿಪ್ರಾಯಗಳನ್ನು ಹಾಗೂ ೧೯೩೭ರ ವಾರ್ಧಾ ರಾಷ್ಟ್ರೀಯ ಶಿಕ್ಷಣ ಸಮ್ಮೇಳನದ ನಿರ್ಣಯಗಳನ್ನು ಇಲ್ಲಿ ಕಾಣಬಹುದು. ೧೮೮೨-೧೯೫೦ರ ಅವಧಿಯಲ್ಲಿನ ಶಿಕ್ಷಕ ಶಿಕ್ಷಣದ ಸಂಕ್ಷಿಪ್ತ ವಿವರಗಳನ್ನು ಲೇಖಕರು ಒದಗಿಸಿದ್ದಾರೆ.