ಕಲಿಕೆಯ ಮಾಪನ

ಪ್ರಸ್ತುತ ಅಧ್ಯಾಯದಲ್ಲಿ ಲೇಖಕರು ಮೌಲ್ಯಾಂಕನದ ಬಗ್ಗೆ ಸುದೀರ್ಘವಾಗಿ ಚರ್ಚಿಸಿದ್ದಾರೆ; ಪ್ರಸ್ತುತ ಬಳಸಲಾಗುತ್ತಿರುವ ಮೌಲ್ಯಾಂಕನದ ವಿಧಾನಗಳು ನಿಜವಾಗಿಯೂ ವಿದ್ಯಾರ್ಥಿಗಳ ಕಲಿಕಾ ಗುಣಮಟ್ಟವನ್ನು ಪರೀಕ್ಷಿಸುತ್ತವೆಯೇ ? ಎಂಬ ಮುಖ್ಯವಾದ ಪ್ರಶ್ನೆಯನ್ನು ಕೈಗೆತ್ತಿಕೊಳ್ಳುತ್ತಾರೆ. ಒಂದು ಮೌಲ್ಯಾಂಕನದ ವಿಧಾನವನ್ನು ಹೇಗೆ ಸಮಂಜಸ ಹಾಗು ವಿಶ್ವಾಸಾರ್ಹ ವಿಧಾನವನ್ನಾಗಿ ಮಾಡಬಹುದು ಎಂಬುದರ ಬಗ್ಗೆಯೂ ಹಲವು ಉಲ್ಲೇಖ ಉದಾಹರಣೆಗಳ ಸಮೇತ ವಿವರಿಸುತ್ತಾರೆ. ಕಡೆಗೂ ಮೌಲ್ಯಾಂಕನವು ನಿಜವಾಗಿ ಏನನ್ನು ಪ್ರತಿನಿಧಿಸಬೇಕು? ಶಾಲೆಯ ವ್ಯವಸ್ಥೆಗೂ ಬಾಹ್ಯ ಜಗತ್ತಿಗೂ ಸಂಬಂಧ ಕಲ್ಪಿಸದ ಇಂದಿನ ಮೌಲ್ಯಾಂಕನದ ವ್ಯವಸ್ಥೆಯನ್ನು ಮೀರಿ ವಿದ್ಯಾರ್ಥಿಗಳ ಅಭಿಪ್ರೇರಣೆ ಕುಂಠಿತವಾಗದಂತೆ ಹೇಗೆ ಮೌಲ್ಯಾಂಕನವನ್ನು ಮಾಡಬಹುದು? ಎಂಬ ಹಲವು ಪ್ರಶ್ನೆಗಳನ್ನು ಎತ್ತುತ್ತಾ ಅದಕ್ಕೆ ಇರಬಹುದಾದಂಥ ಬಹುಮುಖೀ ಪರಿಹಾರಗಳನ್ನು ಚರ್ಚಿಸುತ್ತದೆ.