ಭಾವನೆಗಳು, ಕಲಿಕೆ ಮತ್ತು ಭಾವನಾತ್ಮಕ ಅರೋಗ್ಯ

ಪ್ರಸ್ತುತ ಅಧ್ಯಾಯದಲ್ಲಿ ಭಾವನಾತ್ಮಕ ಆರೋಗ್ಯಕ್ಕೂ ಮಕ್ಕಳ ಕಲಿಕೆಯ ಗುಣಮಟ್ಟಕ್ಕೂ ಇದ್ದಿರಬಹುದಾದ ಸಂಬಂಧವನ್ನು ಅನ್ವೇಷಿಸಲಾಗಿದೆ. ಭಾವನಾತ್ಮಕ ಆರೋಗ್ಯವೆಂದರೇನು, ಅದನ್ನು ಪ್ರಭಾವಿಸುವ ಅಂಶಗಳ್ಯಾವುವು, ವಿವಿಧ ರೀತಿಯ ಭಾವನೆಗಳು ಹಾಗು ಭಾವನಾತ್ಮಕ ಸಮತೋಲನದಲ್ಲಿ ಮುಖ್ಯ ಪಾತ್ರ ವಹಿಸುವ ಅಂಶಗಳು ಯಾವುವು ಎಂಬ ವಿಷಯಗಳ ಬಗ್ಗೆ ಕೂಲಂಕುಷವಾಗಿ ಚರ್ಚಿಸಲಾಗಿದೆ. ವಿಶೇಷವಾಗಿ ಒತ್ತಡದ ಭಾವನೆಯು ಜೈವಿಕವಾಗಿಯೂ ಭಾವನಾತ್ಮಕವಾಗಿಯೂ ಮಕ್ಕಳ ಕಲಿಕೆಯನ್ನು ಪ್ರಭಾವಿಸುವ ಬಗೆಯನ್ನು ಹಲವು ದೃಷ್ಟಾಂತಗಳ ಮೂಲಕ ವಿವರಿಸಲಾಗಿದೆ. ಆತ್ಮಗೌರವ ಎನ್ನುವುದು ನಿಜವಾಗಿಯೂ ಭಾವನಾತ್ಮಕ ಸಮತೋಲನಕ್ಕೆ ಸಹಕಾರಿಯೇ ಎಂಬ ಪ್ರಶ್ನೆಗೆ ಅದರ ಬಗ್ಗೆ ಈಗಾಗಲೇ ನಡೆಸಿರುವ ಹಲವು ಪ್ರಯೋಗಗಳನ್ನಿಟ್ಟುಕೊಂಡು ಉತ್ತರ ಹುಡುಕಲಾಗಿದೆ. ತೃಪ್ತಿಯ ಭಾವನೆಯು ಹೇಗೆ ಹಲವು ಸಂಸ್ಕೃತಿಗಳಲ್ಲಿ , ಸಮಾಜದ ಶ್ರೇಣಿಗಳನ್ನು ಮೀರಿ ಭಾವನಾತ್ಮಕ ಸಮತೋಲನಕ್ಕೆ ಸಹಕಾರಿ ಎಂಬುದನ್ನು ಕೂಡ ಚರ್ಚಿಸಲಾಗಿದೆ.