ಈ ಶಾಲೆಯಲ್ಲಿ ಓದಿದವರು ಎಂಜಿನಿಯರ್‌, ವೈದ್ಯರು, ಪೊಲೀಸ್‌ ಅಧಿಕಾರಿಗಳು ಹಾಗೂ ಲೆಕ್ಕಿಗರಾಗಿದ್ದಾರೆ

ಮರಲಭಾವಿ ಜಿಪಿಎಚ್‌ಎಸ್‌ ಶಾಲೆಯ ವಿಷಯಗಳನ್ನು ಪ್ರಸ್ತುತ ಲೇಖನದಲ್ಲಿ ತಿಳಿಸಲಾಗಿದೆ. ಹಲವು ಕಾರ್ಯಾಗಾರಗಳ ತರಬೇತಿ ಪಡೆದ, ಸಾಮರಸ್ಯದಿಂದ ಕೆಲಸವನ್ನು ನಿರ್ವಹಿಸುವ ಶಿಕ್ಷಕರ ತಂಡದ (ಶಿವಪ್ಪ ಸಜ್ಜನ್‌, ಶಂಕರಗೌಡ ಪಾಟೀಲ್‌, ರಾಜೇಶ್‌ ಮುಜವರ್‌, ಶಿವಕುಮಾರ್‌, ಕಾಂತೇಶ್‌, ಶ್ರೀಧರ್‌ ಮಲ್ಜಿ, ಅಣ್ಣಪ್ಪ ಗೌಡರ್‌ ಪಾಟೀಲ್‌) ವಿದ್ಯಾರ್ಥಿಗಳನ್ನು ಕುರಿತ ನಿರಂತರ ಕಾಳಜಿ ಹಾಗೂ ಮಕ್ಕಳ ಕಲಿಕೆಯ ಅತ್ಯುತ್ತಮ ದಾಖಲೆಗಳು ಗಮನಾರ್ಹ ಅಂಶಗಳೆನಿಸಿವೆ. ಪ್ರಾಜೆಕ್ಟ್‌ಗಳ ಪ್ರದರ್ಶನದ ಮೂಲಕ, ಮಕ್ಕಳಲ್ಲಿ ಅಡಗಿರುವ ಪ್ರತಿಭೆಯನ್ನು ಸಮುದಾಯಕ್ಕೆ ಪರಿಚಯಿಸಿ, ಪೋಷಕರಲ್ಲಿ ಶಾಲೆಯ ಬಗ್ಗೆ ವಿಶ್ವಾಸವನ್ನು ಮೂಡಿಸಲಾಗಿದೆ. ದಂಡನೆಯ ಪದ್ಧತಿಯಿಲ್ಲದ ಈ ಶಾಲೆಯ ಮಕ್ಕಳು ಜವಾಬ್ದಾರಿಯುತ ನಡವಳಿಕೆಯನ್ನು ರೂಪಿಸಿಕೊಂಡಿದ್ದಾರೆ. ಕ್ರೀಡೆ, ಬರಹ, ಚರ್ಚೆ ಮುಂತಾದ ಸ್ಫರ್ಧೆಗಳಲ್ಲಿ ಇಲ್ಲಿನ ಮಕ್ಕಳು ಮುಂಚೂಣಿಯಲ್ಲಿದ್ದಾರೆ.