ಬದುಕಿನ ವಾಸ್ತವತೆ ಮತ್ತು ಶಿಕ್ಷಣ

ಈ ಲೇಖನದಲ್ಲಿ ಲೇಖಕರು, ಶಿಕ್ಷಣವನ್ನು ವಾಸ್ತವಕ್ಕೆ ಸ್ಪಂದಿಸದ ಮನಸ್ಸುಗಳನ್ನು ತಯಾರಿಸುವ ಪದ್ಧತಿ ಎಂದು ತಿಳಿಸುತ್ತಾರಲ್ಲದೆ, ಅದು, ಸಮಾಜದ ಭಾಗವಾಗಿ ಬದುಕಬೇಕಿರುವ ನಮ್ಮ ಮಕ್ಕಳಿಗೆ, ಸುತ್ತಲಿನ ಪರಿಸರಕ್ಕೆ ಸ್ಪಂದಿಸುವ ಅವಕಾಶವನ್ನು ನೀಡುವುದಿಲ್ಲವೆಂದು ವಿಷಾದಿಸುತ್ತಾರೆ. ಕೇವಲ ಯಶಸ್ಸಿನ ಕನಸಿನ ಲೋಕಕ್ಕೆ ತಯಾರುಮಾಡುವ ಈ ಶಿಕ್ಷಣವು ಕೊನೆಗೆ, ಮನುಕುಲದ ವಿನಾಶಕ್ಕೇ ಕಾರಣವಾಗಬಹುದು. ಅಬ್ರಹಾಂ ಲಿಂಕನ್‌ ಅವರು ತಮ್ಮ ಮಗನು ಓದುತ್ತಿದ್ದ ಶಾಲೆಯ ಮುಖ್ಯೋಪಾಧ್ಯಾಯರಿಗೆ ಬರೆದ ಪತ್ರದ ಉಲ್ಲೇಖವನ್ನು ಇಲ್ಲಿ ಕಾಣಬಹುದು. ಈ ಪತ್ರವು ಶಿಕ್ಷಕರು ಮಕ್ಕಳ ಬೋಧನೆಯನ್ನು ಕುರಿತಂತೆ ಗಮನಿಸತಕ್ಕ ಹಲವಾರು ಪ್ರಮುಖ ಅಂಶಗಳನ್ನು ಒಳಗೊಂಡಿದ್ದು, ವಿನಯವಂತಿಕೆ, ಆತ್ಮವಿಶ್ವಾಸ, ಬಿಡುವು, ಮಾನವೀಯತೆ ಮುಂತಾದ ವಿಷಯಗಳನ್ನು ಪ್ರಸ್ತಾಪಿಸಲಾಗಿದೆ. ಗಂಡು ಮತ್ತು ಹೆಣ್ಣು ಮಕ್ಕಳ ಅಸಮಾನ ಲಿಂಗಾನುಪಾತದ ಕುರಿತು ಲೇಖನದಲ್ಲಿ ಕಳವಳವನ್ನು ವ್ಯಕ್ತಪಡಿಸಲಾಗಿದ್ದು, ಶಿಕ್ಷಣವು ಬದುಕನ್ನು ರೂಪಿಸುವ ರೀತಿಯ ಕುರಿತ ಮರುಚಿಂತನೆಗೆ ಕರೆನೀಡಲಾಗಿದೆ.